Yurtimizdagi aksariyat soha vakillari o‘zlarining kasb bayramlariga ega. O‘zbekistonda qonun bilan belgilangan bu sanalar har yili kasb-kor egalari tomonidan ko‘tarinki ruhda nishonlanadi. Quyida ana shunday bayramlar haqida:

8 yanvar – O‘zbekiston Respublikasi prokuratura organlari xodimlari kuni. Mazkur kun O‘zbekiston Respublikasining 2016 yil 19 dekabrdagi Qonuni bilan belgilangan. Prokuratura organlari xodimlari o‘z kasb bayramlarini ilk bor 2017 yilda nishonlaganlar.

14 yanvar – Vatan himoyachilari kuni. Ushbu kun O‘zbekiston Respublikasining 1993 yil 29 dekabrdagi Qonuniga asosan O‘zbekiston Respublikasi Qurolli Kuchlarining mamlakat mustaqilligini hamda hududiy yaxlitligini, xalqimizning tinch hayotini va mustaqillikni mustahkamlash yo‘lidagi bunyodkorlik mehnatini himoya qilishdagi, yosh avlodni vatanparvarlik ruhida tarbiyalashdagi ahamiyatini, shuningdek, O‘zbekiston hududida joylashgan harbiy tuzilmalarning 1992 yil 14 yanvardan respublika yurisdiksiyasiga o‘tkazilganligini inobatga olib belgilangan. Yurtimizda 14 yanvar sanasi Vatan himoyachilari kuni sifatida birinchi marta 1994 yilda nishonlangan.

26 yanvar – O‘zbekiston Respublikasi davlat bojxona xizmati organlari xodimlari kuni. Mazkur kun O‘zbekiston Respublikasining 2018 yil 22 dekabrdagi Qonuni bilan belgilangan. O‘zbekiston Respublikasining yagona bojxona siyosatini amalga oshirish va iqtisodiy manfaatlarini himoya qilish bilan shug‘ullanuvchi mazkur soha xodimlari o‘z kasb bayramlarini ilk bor 2019 yilda nishonladilar. Bundan tashqari, 26 yanvar – Butunjahon Bojxonachilar kuni ham hisoblanadi. 

22 mart – Mahalla tizimi xodimlari kuni. Ushbu sana O‘zbekiston Respublikasining 2020 yil 2 martdagi “Mahalla tizimi xodimlari kunini belgilash to‘g‘risida”gi Qonun asosida joriy etildi. Bunga qadar har yili avgust oyining birinchi yakshanbasida Mahallalar kuni nishonlanar edi.

Aprel oyining birinchi yakshanbasi – O‘zbekiston Respublikasi geologiya sohasi xodimlari kuni. Ushbu kunni belgilash to‘g‘risidagi Qonun 2018 yil 26 dekabrda qabul qilingan. 

15 aprel – O‘zbekiston Respublikasi madaniyat va san’at xodimlari kuni. Ushbu kun 2021 yil 7 iyundagi “O‘zbekiston Respublikasi madaniyat va san’at xodimlari kunini belgilash to‘g‘risida”gi Qonun bilan belgilangan. Soha xodimlari o‘z kasb bayramlarini 2022 yilda ilk bor nishonlaydilar.

18 aprel – O‘zbekiston Respublikasi uy-joy kommunal xizmat ko‘rsatish sohasi xodimlari kuni. Mazkur kunni belgilash to‘g‘risidagi Qonun 2018 yil 2 aprelda qabul qilingan. Uy-joy kommunal xizmat ko‘rsatish sohasi xodimlari o‘z kasb bayramlarini ilk bor o‘sha yilning o‘zidayoq nishonladilar.

May oyining uchinchi yakshanbasi – O‘zbekiston Respublikasi kon-metallurgiya sanoati xodimlari kuni. Ushbu kun mamlakatning iqtisodiy salohiyatini rivojlantirish va mustahkamlashda kon-metallurgiya sanoatining ahamiyati muhimligini e’tiborga olib, ko‘p ming kishilik jamoalarining kon-metallurgiya sanoatini rivojlantirish hamda kadrlar tayyorlashga qo‘shgan hissalarini qayd etgan holda 2001 yil 12 maydagi Qonun asosida belgilangan. Mazkur soha xodimlari o‘z kasb bayramlarini ilk bor o‘sha yili 20 mayda nishonlaganlar.

27 iyun – O‘zbekiston Respublikasi matbuot va ommaviy axborot vositalari xodimlari kuni. Mazkur sana matbuot va ommaviy axborot vositalarining davlat istiqlol g‘oyalarini targ‘ib etish, yangi demokratik jamiyat qurishda, aholini Vatanga sadoqat ruhida tarbiyalash borasidagi xizmatlarini e’tirof qilgan holda belgilangan. Ushbu kasb xodimlari kunini belgilash to‘g‘risidagi Qonun 1993 yil 3 sentyabrda qabul qilingan. O‘zbekistonning matbuot va ommaviy axborot vositalari xodimlari o‘z kasb bayramlarini ilk bor 1994 yilda nishonlaganlar.

Iyun oyining oxirgi yakshanbasi – O‘zbekiston Respublikasi savdo, matlubot kooperatsiyasi va aholiga maishiy xizmat ko‘rsatish xodimlari kuni. Mazkur kunni belgilash to‘g‘risidagi Qonun 1997 yil 25 aprelda qabul qilingan. Yuqoridagi soha xodimlari o‘z kasb bayramlarini ilk bor o‘sha yilning o‘zidayoq nishonladilar.

Avgust oyining birinchi yakshanbasi – O‘zbekiston Respublikasi temir yo‘l transporti xodimlari kuni. Mazkur sana Prezidentning 2017 yil 2 avgustdagi farmoniga asosan temir yo‘llarda yuk va yo‘lovchilarni tashish hajmini oshirish, temir yo‘l infratuzilmasini rivojlantirish borasida oxirgi yillarda erishilgan yutuqlarni hisobga olib hamda soha mutaxassislarini qo‘llab-quvvatlash maqsadida 2017 yildan boshlab nishonlanib kelmoqda. Mazkur kunni belgilash to‘g‘risidagi Qonun 2017 yil 20 dekabrda qabul qilingan.

Avgust oyining ikkinchi yakshanbasi – O‘zbekiston Respublikasi qurilish sohasi xodimlari kuni. Respublikada amalga oshirilayotgan qurilish va bunyodkorlik ishlarini jadallashtirish, bugungi kunda sohada qo‘lga kiritilayotgan yutuqlarni keng targ‘ib etish va sohada faoliyat olib borayotgan mutaxassislarni rag‘batlantirish maqsadida ushbu sana ham 2017 yildan boshlab nishonlanmoqda. “O‘zbekiston Respublikasi qurilish sohasi xodimlari kunini belgilash to‘g‘risida”gi Qonun 2017 yil 21 dekabrda qabul qilingan.

Avgust oyining uchinchi yakshanbasi – O‘zbekiston Respublikasining Havo floti kuni. Mamlakat qudratini va iqtisodiyotini mustahkamlashda, xalqaro va ichki qatnovni ta’minlashda Havo flotining muhim ahamiyatini e’tiborga olib, mazkur kunni belgilash to‘g‘risidagi Qonun 1995 yil 31 avgustda qabul qilindi. Toshkent aviatsiya ishlab chiqarish birlashmasi, “O‘zbekiston havo yo‘llari” Milliy aviakompaniyasi ko‘p ming kishilik jamoalari, Harbiy Havo Kuchlari harbiy xizmatchilari va o‘quv yurtlari professor-o‘qituvchilari mazkur kasb bayramini ilk bor 1996 yilda nishonladilar.

26 sentyabr – O‘zbekiston Respublikasi Davlat xavfsizlik xizmati organlari xodimlari kuni. Ushbu kun 2021 yil 14 sentyabrdagi “O‘zbekiston Respublikasi Davlat xavfsizlik xizmati organlari xodimlari kunini belgilash to‘g‘risida”gi Qonunga asosan nishonlanadi. 

1 oktyabr – O‘qituvchi va murabbiylar kuni. Boshqa kasb kunlaridan farqli o‘laroq ushbu kun bayram (dam olish) kuni hisoblanadi. Bu kunni belgilash to‘g‘risidagi Qonun 1996 yil 27 dekabrda qabul qilingan. 1994–1996 yillarda o‘qituvchi va murabbiylar oktyabr oyining birinchi yakshanbasini Xalq ta’limi xodimlari kuni sifatida nishonlagan bo‘lsalar, 1997 yildan boshlab 1 oktyabrni bayram qilib kelmoqdalar.

25 oktyabr – O‘zbekiston Respublikasi ichki ishlar organlari xodimlari kuni. Ushbu kunni kasb kuni sifatida belgilash 2006 yil 6 dekabrdagi Qonun asosida amalga oshirilgan. Ichki ishlar organlari xodimlari 2007 yildan boshlab o‘z kasb bayramlarini nishonlab kelmoqdalar.

Noyabr oyining ikkinchi yakshanbasi – O‘zbekiston Respublikasi tibbiyot xodimlari kuni. Ushbu kunni belgilash to‘g‘risidagi Qonun 2006 yil 12 sentyabrda qabul qilingan. Respublikamizning tibbiyot xodimlari ilk bor 2006 yil 12 noyabrda o‘z kasb kunlarini o‘tkazishgan bo‘lishsa, joriy yilda 14 noyabrda nishonlashadi.

Dekabr oyining ikkinchi yakshanbasi – O‘zbekiston Respublikasi qishloq xo‘jaligi xodimlari kuni. Mazkur kunni belgilash to‘g‘risidagi Qonun 2017 yil 25 avgustda qabul qilingan. Yurtimizning qishloq xo‘jaligi xodimlari o‘z kasb bayramlarini ilk bor o‘sha yilning o‘zida nishonlaganlar.

Ma’lumot o‘rnida qayd etish joizki, O‘zbekiston Respublikasi Oliy Majlisi Qonunchilik palatasi Kengashining va O‘zbekiston Respublikasi Oliy Majlisi Senati Kengashining 2019 yil 26 martdagi Qo‘shma qarori bilan tasdiqlangan “To‘g‘ridan-to‘g‘ri amal qiluvchi qonunlarda tizimlashtirilishi va unifikatsiya qilinishi lozim bo‘lgan qonun hujjatlarini qayta ko‘rib chiqish bo‘yicha Yo‘l xaritasi”ga asosan kasb bayramlariga oid yigirmaga yaqin qonunchilik hujjatlarini “Kasb bayramlari to‘g‘risida”gi yangi Qonunga tizimlashtirish va unifikatsiya qilish belgilangan. 

Mart 05, 2025
Muharrir: Jabberganov Orifjon
Ko‘rishlar soni: 59 marta